Beste burgemeister,
Om aeve te beginne mit ein wies les (want volges mich höb se get te lang in Amsterdam gezaete). Vastelaovend is ein volksfees! Sjterker nog, de Remunjse vastelaovend is ein sjtraotvolksfees! Al mien ganse laeve vier ich vastelaovend in Remunj.
Aldus begint de brief op Facebook en wij als Roerdaljournaal vervolgen hem hier; daarna een foto van debutgemeester verkleed op zaterdag jl tijdens carnaval 2024 in Roermond en daarna op weer een aparte site op dit Journaal een greep uit de vele reacties op FB. Redactie Roerdaljournaal.nl:
we vervolgen de open brief van Latta: )
‘t Is mich mit de paplaepel d’r in gegaote en daorom doon ich d’r alles aan om de Remunjse vastelaovend op zien mins in sjtandj te haje, maar ‘t leefs nog groter en sjoner te make. Doe zols mich waal neet kinne (want doe höbs get te lang in Amsterdam gezaete) maar det kömp nog waal. Oppe Sjtasiefestasie waas ich jaore podiummanager en höb same mit de organisatie dit volksfees groter en groter gemaak. Vanaaf dit jaor is dit ein ivvenement en kint neet ein eder meer zegke ‘kom veer gaon aeve nao de Sjtasie eine drinke’. Dao höb ich penspien van, want vastelaovend is veur en van ederein..ein volksfees dus. De verhaole euver veiligheid en controlle kin ich maar moeilik vertaere..maar allebenäör, dao is al genog euver gezag en dao wil ich mich mit dich neet euver gaon sjtraevele.
Giesteraovend heurde ich namelik get euver de vastelaovend oppe Roerkade wo mich bienao de boks van oet veel.
– Doe wils det dao op sommige daag maeters hoge hekke neer waere gezat en det de kasteleins die dan maar zelf motte verplaatse es ‘t van uch moog?!?!
– Edere kastelein mot eine beveiliger aan de deur höbbe sjtaon!?!?
– Boete moog geine meziek meer waere gemaak!?!?
– Boete moog gein buffet meer sjtaon!?!?
…en noe kömp ‘t…
– Nemes moog boete ein glaas..nae sorry..plastic baeker beer drinke!!!!
Maedje…noe loester…vinj se ‘t dan gek det ich dink des se get te lang in Amsterdam höbs gezaete.
Veural dien oetsjpraok des se nieks meer gedoogs (en d’r ein paar juriste op höbs gezat), höbbe mich aan ‘t dinke gezat. Want beste Yolanda, geis se dan morge die twee wietwinkelkes sjloete? Geis se dan die pandjeshanjelaere aanpakke?Doe wits waal wo 64 a,b,c,d,e,f oppe deur sjteit ein allein a,b en c van waert opgegaeve. Waere d’r morge ein paar jonges opgepak die al maondje van Remunj en F1 circuit make…en zo kin ich nog waal aeve doorgaon..
‘T is netuurlik mekkeliker om taege eine hel werkende kastelein te zegke des se nieks meer gedoogs en dem dan zien zoer verdeende cente oet de tes klops. Dan op te traeje taege ein paar grote criminele.
Mien vraog aan dich is om nog ins good mit de Remunjse kasteleins te ongerhanjele en d’r same ein groot volksfees van te make. Want waat geis se doon es mit good waer de ganse werf vol sjteit en ederein zich dao op sjtraot eine drink en zich ammezeert? Geis se dan weer de pliese te paerd oprope om ‘t volksfees te komme versjteure? Wil se van de ganse vastelaovend ein gecontroleerd ivvenement make wo det veer ein kaertje veur motte koupe om get te drinke in os sjtamkroeg? Vertel de vastelaovendvierder ins waas se van plan bös!
Ich kin dich in eder geval vertelle det gans vastelaovesvierend Remunj d’r ein volksfees van geit make en det doon veer ouch geweun oppe sjtraot…want de vastelaovend is van en veur ederein en vastelaovend is gein ivvenement wodet ich ein kaertje veur mot koupe.
P.S. Ich höb urges gelaeze des se ouch mit vrunj vastelaovend viers. Ligk geer dan ouch biejein? Dan kömp se d’r achter wie henjig det det is. Degene mit de pot mot namelik weer alle plastic baekers höbbe veur det d’r geit besjtelle. Neet te doon! De eine is piese, de angere sjteit urges in de hook get te wazele…of betaald eder veur zich…es det zo is dan höb se mesjien te lang in Amsterdam gezaete.
Marc Latta (alias de Sjtadsvastelaovesdichter)