By januari 8, 2013 10:46 am Lees verder →

(herhaling op verzoek) De Nuuje Remunjse Uulpe-prins Herm I (Belgers): “De naas achternao is ouch veuroet”.

Remunj / Herte – As Herm I geit Herm Belgers oet Herte dit joar de Uule oet Remunj veur in de vastelaovend. Adjudante zeen Ralph Bult en Gijs Brand en zien broor Stef Belgers is sjoffeur van het prinselik gezelsjap. (alle veer op de foto)

Oetveurige passages oet het intervjoe van Jean Philip Laugs op de site van D’n Uul volgen hiej: “In Herte aangekómme vélt ’t aevel diek mit, en op de aafgesjpraoke tied vaar ich langs ’t opgegaeve adres is d’r is pas ein nuuj kiendje gekómme bie de prins… en inderdaad, det is te zeen. Terwiel ich mich ein gooj plaats zeuk veur te parkere, zjweijt de veurdeur aop en versjient ein silhouet in ‘t leech. Det is dus de nuuje! Efkes later. Ein ferme hándj en ein sjnelle eerste monstering: jonge kaerel, baer van eine vent, uig sympathiek, liek mich eine echte wuiles. Sjoon hoes det aad en nuuj kombineert. Ich waer veurgesjteld aan zien vrouw, Loes, en de 4 waeke jonge Sep, ein prachtig kaerelke, bie mam op de érm. Dochter Isa, binnekort angerhalf, ligk in bed. Ich bön gás in ‘t nés van Herm Belgers, 29 jaor aad, de nuuje sjtadsprins van Remunj.

Herm (gebaore 1983) is de aajste zoon van Geert Belgers…. es opfrissing van ’t geheuge: Geert Belgers sjpeelde de ról van ruiverhaufman in de Schinderhannesopveuringe van 1995 en 2002, en diej van de kastelein Schwarze Peter in 2009. Baovedet deje vader Geert en mooder Hetty vreuger jaor-in-jaoroet mit aan de bontje aovende van D’n Uul. In Herm zien aore sjtruimp dus ’t riechtige Remunjse blood. Det bliek get later opnuuj es hae ein foto leut zeen oet 1995, wiej hae zien debuut op ’t toneel maakde es kleine ruiver in de Schinderhannes. “Fantasties vónj ich det, det ich det mit mien vader moogde belaeve”, zaet Herm. Ouch in de Kienjermiddaag van D’n Uul haet t’r podiumervaring opgedaon. De Belgerse zeen ein Hertese femieliej. ‘t Binnesjtadse blood – es me dao van sjpraeke moog – kump van moders kántj..

Boete de prieze
Es klein men-ke trók Herm dökker mit in de optóch van Herte. “Ich vónj ‘t leuk, tösse al diej miense, d’r bie zeen en de aandách dae se dan kriegs.” Omdet Opa in de zjurie zoot waerde noojt eine pries gewónne. Mér dao ging ’t ouch neet om. Vastelaovend waas altied ‘t zellefde program, vertelt Herm: kienjermiddaag, kienjeroptóch, optoch in Herte, Herteheym, de Remunjse optóch, kefeejbezeuk, Bacchusverzoepe.

Vanaaf zien 14e is ’t viere aevel beperk gebleve toet ’t veursezoen en de vriedaag en de zaoterdaag van de vastelaovend zellef. Op zondaag verkasde ’t gezin – Geert, Hetty, Herm en broor Stef – nao Eusteriek veur de wintjersjport. De berg trékke sowieso, want in de zomer waerd gewánjeld in Zjwitserlándj……

Väöl miense zálle Herm mesjiens kinne van wiej hae oberde bie de Tram. Det waas get waat hae jaore langk mit plezeer deej en es hae effe de kans krieg nog duit en ’t angere kefeej van ziene veurkeur is Dupont.

Waat Herm duit veur de kós
Herm wirk bie Stream Group in Maerum, op eine sjteinworp aafsjtándj
van zien hoes. Hae is t’r begós es stagiaire en wirk t’r noe al weer zo-n 6 jaor. Stream Group is ein softwarebedrief det aktief is in de digitale-tillevisiemért. Ze höbbe ein state-of-the-art platform veur digitale tillevisie ontwikkeld, wodoorse op eder apparaat – van tillefoon toet computer en van tillevisie toet teblet – kins kieke nao ‘t programma of de film van dien keuze op ‘t moment dets doe det wils. Herm wirk in ‘t service management van ‘t bedrief en zorg d’r onger angere veur det opdráchgaevers euver de ganse waereld

Herm sjpeelt al van kiensjbein aaf hockey bie Concordia. Vreuger is hae waal ins kampioen gewaes mit ein van de teams. Toen waas ’t sjtried op ’t véldj en ginge ze d’r-aan. Allewieles zaet Herm van zich zellef det hae “veural eine jong is van de gezelligheid.” Dae achtergróndj – ouch de adju’s sjpele bie Concordia – bringk sjtraks bie ’t oetrope dinkelik eine flinke troep luuj op de bein. Herm verheug zich op de gezichte …

Adju van Bacchus
In 2009 dreijde Herm al ins ein gans vastelaovessezoen, es adjudant van Bacchus. Wiej sjoon kint ’t zeen: de Bacchus van toen, Gijs I, ein van zien beste vrúnj, is noe adjudant biehem. Topmomente ware toch waal de Sjtasiefestasie en ’t Bacchusverzoepe det jaor…. Hae en Loes vinje de Sjasiefestaie ein fantasties evenement omdet ’t de jeug leert waat vastelaovend inhilt. ’t Bacchusdrieve waerd ouch sjoon. Herm zál ’t “Verzoepnummer” zinge.
… Nao ‘t pólse door de PKK waerde hae offiesjeel es prins igevraog door de veurzitter. Herm vindj ’t jaomer det D’n Uul dit jaor geine vors meer haet. Hae had Sybaer, ein uul wo hae väöl achting veur haet, gaer in funksie mitgemaak. Leuk om te weite is aevel det ’t vraoge gefilmp is en ein ongerdeil zal zeen van de Uulefilm diej in de maak is!

Herm geit regeere es Herm I. “Herm is miene duipnaam. Zo sjteit t’r ouch in miene pas. ’t Is dus neet Maan II mér Herm I”, zaet t’r. Zien motto is “De naas achternao is ouch veuroet”. De sjpreuk is bedách door Loes. ‘t Teikent hem zo wiej det t’r is: eine betrókke miens dae gaer is en geit wo de aksie is; ouch eine geveulsmiens dae zien intuïsie volg en zo van zellef kump wo det t’r mót zeen

Hoesorde
’t Prinsekruuts haet verwiezinge nao hockey en saxofoon, ’t instrument det hae vreuger haet gesjpeeld De möts van Herm is degelik blauw. De hoesorde is gemodelleerd nao ein kúnswerk van Herteneer Seppe Lamers, det Herm in dehoeskamer haet hánge. ’t Is eine sjterk gestileerde kop dae nao baove kiek. In blinkend metaal oetgeveurd kump zie in twee oetveuringe: veur ‘t Uulegezélsjap es sjpängske, veur angere es orde aan ein blauw lintj, mér wiejer gein versjil.

29 Jaor is jongk, mér Herm is neet de jongste Uuleprins.Det waas en blief Maurice Zwanenberg, dae in 1989 27 jaor jóngk waas. Herm hockeyt mit hem en had det fees toen gaer bewús mitgemaak. Mér doe kins neet alles höbbe: wiej Black Pantalonia de wándj leet rámmele waas hae 5 jaor! Dao sjteit aevel get taegeneuver. Namelik dit: Herm is eine weuste prins, es dorslöstige hoogheid mesjiens waal de meis weuste oojt: mäötje 58 in ‘t hemp en mäötje 46 in de sjoon, om persies te zeen. Laksjoon in diej maot leke efkes ein probleem, mér det waerde roeps opgelos. Erger waas det ‘t prinsepák van geins kénj pásde. D’n Uul mós eiges veur Herm ein nuuj laote make … Mit zien vrunj Gijs en Ralph es adjudante en zien broor Stef es sjefäör haet Herm zien Prinselik Gezélsjap kompleet. …..’

Jean-Philip Laugs



Posted in: Geen categorie